BAKI, AzerVoice
Çilidə 7,5 bal gücündə baş verən zəlzələdən sonra tsunami təhlükəsinə görə ölkənin cənubundakı Maqalyanes bölgəsində təxliyə elan edilib.
AzerVoice xəbər verir ki, bu barədə məlumatı Çilinin Təbii Fəlakətlərlə Mübarizə Xidməti verib.
"Sunami təhlükəsi ilə əlaqədar olaraq, Təbii Fəlakətlərlə Mübarizə Xidməti Maqalyanes bölgəsindəki sahilyanı ərazini tərk etməyi xahiş edir" – deyə, məlumatda bildirilib.
Qeyd edək ki, Çili Seysmoloji Xidmətinin verdiyi məlumata görə, 7,5 bal gücündəki zəlzələ Puerto-Uilyams şəhərindən 218 km məsafədə baş verib. Yeraltı təkanların ocağı yerin 10 km dərinliyində yerləşib.
Həmçinin onu da qeyd edək ki, bu zəlzələdən sonra yaranan tsunaminin növbəti iki saat ərzində ölkənin Antarktidadakı bazalarının yerləşdiyi sahillərə çatacağı gözlənilir.
Çilinin Hərbi Dəniz Qüvvələrinin Hidroqrafiya və Okeanoqrafiya Xidmətinin yaydığı məlumatda bildirilib ki, tsunami saat 11:35-də (Bakı vaxtı ilə 19:35) Arturo Prat antarktik stansiyasına, saat 12:00-da (20:00) isə Henaral-Bernardo-O'Higgins stansiyasına çatacaq. Böyük dalğaların Biqul boğazında yerləşən Puerto-Uilyams şəhərinə isə saat 14:50-də (22:50) çatacağı gözlənilir.
