BAKI, AzerVoice
PKK/YPG Suriyada 286 uşağı silahlı qüvvələrə zorla cəlb edib.
AzerVoice xəbər verir ki, BMT-nin baş katibi Antonio Quterreşin təqdim etdiyi “Uşaqlar və Silahlı Münaqişə” adlı 2024-cü il hesabatında terror təşkilatı PKK/YPG-nin Suriyada uşaqlardan istifadə etdiyi faktlar təsdiqlənib.
Hesabata əsasən, ötən il Suriyada müxtəlif silahlı qruplar, xüsusilə PKK/YPG və onun törəmə ünsürləri, eləcə də İŞİD tərəfindən ümumilikdə 527 uşaq silahlı fəaliyyətə cəlb edilib. Onlardan 286-sının PKK/YPG tərəfindən zorla silahlandırıldığı BMT tərəfindən təsdiq olunub.
Sənəddə həmçinin PKK/YPG-nin nəzarətində olan ərazilərdə 2024-cü ildə 110 uşağın həyatını itirdiyi və ya əlil qaldığı, 10 uşağın isə zorla qaçırıldığı vurğulanır. Təşkilatın həmçinin məktəb və xəstəxana kimi mülki obyektlərdən hərbi məqsədlərlə istifadə etdiyi bildirilir.
Quterreş hesabatda uşaqların silahlı qruplardan dərhal və qeyd-şərtsiz azad edilməsinə çağıraraq, müvafiq dövlət qurumlarının bu uşaqların reinteqrasiyası üçün BMT ilə birgə proqramlar həyata keçirməsini tövsiyə edib.
Qeyd edək ki, Suriyanın şimal-şərqində PKK/YPG-nin nəzarətində olan düşərgələrdə hazırda İŞİD-ə bağlılıqda şübhəli bilinən 25 minə yaxın uşaq azadlıqdan məhrum vəziyyətdə saxlanılır.
