BAKI, AzerVoice
Apple bir açıqlaması ilə 75 milyard dollar dəyər itirib.
AzerVoice xəbər verir ki, Apple şirkətinin proqram təminatı rəhbəri Craig Federighi-nin WWDC 2025 konfransında səsləndirdiyi bir cümlə texnologiya nəhənginin dəyərində kəskin enişə səbəb olub.
Tədbirin əsas təqdimatı zamanı Federighi Apple-ın süni intellekt
strategiyasından bəhs edərək Siri-nin təkmilləşdirilmiş
versiyasının yalnız gələn il istifadəyə veriləcəyini bildirib.
“Biz Siri-ni daha şəxsi edəcək funksiyalar üzərində işləməyə davam
edirik. Bununla belə, bu xüsusiyyətlərin Apple-ın yüksək keyfiyyət
standartlarına çatması üçün vaxt lazım idi. Ona görə də gələn il
daha çoxunu paylaşacağıq.”- deyə O, çıxışında deyib.
Bu açıqlama investorlar tərəfindən əsas AI yeniləməsinin gecikməsi kimi şərh edilib və nəticədə Apple səhmləri cəmi bir neçə dəqiqə ərzində 2,5 faiz dəyər itirib. Bu, şirkətin bazar dəyərində təxminən 75 milyard dolların silinməsi ilə nəticələnib.
“Times of India”nın məlumatına görə, FinTech şirkəti Wedbush Securities-in analitiki Den Ayves investor qeydlərində bildirib ki, “WWDC yalnız bir vizyon təqdim etdi, lakin süni intellekt sahəsində ciddi irəliləyiş nümayiş olunmadı. Apple bu sahədə uğur qazana bilər, lakin strategiyanı daha aydın şəkildə ortaya qoymaq üçün hələ vaxt lazımdır.”
Qeyd edək ki, Apple-ın fərdiləşdirilmiş Siri funksiyalarını gecikdirdiyi barədə xəbərlər ilk dəfə bu ilin mart ayında yayılmışdı. 2024-cü ildə keçirilən tədbirdə Siri-nin yeni versiyasının 2025-ci ilin yazında təqdim olunacağı açıqlanmışdı.
