BAKI, AzerVoice
AI şirkətinin rəhbəri xəbərdarlıq edir- “Süni intellekt kütləvi işsizliyə səbəb ola bilər. ”
AzerVoice xəbər verir ki, süni intellekt sahəsində fəaliyyət göstərən aparıcı şirkətlərdən biri olan Anthropic-in baş direktoru Dario Amodei yaxın illərdə süni intellektin əmək bazarını ciddi şəkildə poza biləcəyi barədə xəbərdarlıq edib. Onun sözlərinə görə, həm hökumətlər, həm də özəl sektor bu sürətli texnoloji dəyişikliyə hazır deyil.
Amodei bildirib ki, süni intellekt artıq bir çox zehni tapşırıqlarda insanlardan daha üstün performans göstərir. Bu isə sırf ofis və intellektual işlərlə məşğul olan – yəni “ağ yaxalı” adlandırılan – peşə sahiblərini birbaşa risk altında qoyur. Onun fikrincə, qarşıdakı 1-5 il ərzində süni intellekt ABŞ-da giriş səviyyəli ofis işlərinin yarısını əvəz edə və işsizlik səviyyəsini 20 faizə qədər artıra bilər.
Amodeinin bu açıqlaması daha öncə akademik dairələrdə səslənmiş bənzər narahatlıqların sənaye içindən də təsdiqləndiyini göstərir. Onun sözlərinə görə, bu dəfə risk yalnız aşağı ixtisaslı işlərlə məhdudlaşmır – süni intellekt illərlə təhsil və təlim tələb edən yüksək ixtisaslı sahələri də əvəz edə bilər.
Anthropic-in məlumatına əsasən, hazırda istifadəçilərinin 60 faizi süni intellekti işçi qüvvəsini dəstəkləmək üçün, 40 faizi isə birbaşa insan əməyini əvəz etmək üçün istifadə edir. Bu nisbətin getdikcə avtomatlaşdırmanın xeyrinə dəyişdiyi qeyd olunur. Şirkət bu yaxınlarda 7 saat fasiləsiz işləyə bilən yeni AI modelini təqdim edib.
Amodei həmçinin texnologiya şirkətlərinə “AI vergisi” tətbiq olunmasını təklif edib ki, süni intellektin yaratdığı iqtisadi fayda cəmiyyətə daha ədalətli şəkildə paylansın: “Bu, şəxsi maraqlarıma uyğun olmasa da, bu məsələni müzakirə etməyə dəyər.”
Qeyd edək ki, bəzi mütəxəssislər süni intellektin bütün peşələri deyil, əsasən müəyyən tapşırıqları avtomatlaşdıracağını düşünür. Bu isə insanlara daha yaradıcı və kompleks vəzifələrə fokuslanmaq üçün imkan yarada bilər. Lakin Virciniya Universitetindən professor Anton Korinek xəbərdarlıq edib: “Keçmişdə texnologiyalar yeni iş sahələri yaratdı, lakin bu dəfə maşınlar bu işləri bizdən daha tez öyrənə bilir.”
