BAKI,AzerVoice
İngiltərənin Arsenal futbol klubu 22 il klubda çalışan əməkdaşını İsrail əleyhinə paylaşım etdiyinə görə işdən çıxarıb.
AzerVoice xəbər verir ki, klubun avadanlıq üzrə məsul şəxsi Mark Bonnik, ötən il Qəzza zolağına edilən İsrail hücumları ilə bağlı sosial mediada paylaşdığı fikirlərə görə əvvəlcə müvəqqəti olaraq vəzifəsindən uzaqlaşdırılıb, daha sonra isə onunla əməkdaşlığa son verilib.
"HƏMAS oktyabr ayında bütün girovları azad etməyi təklif edib. Sionist İsrail rədd edib. Zülm kompleksi Kabilin işarəsidir"- Bonnikin paylaşımında bu ifadələr yer alıb. Bonnick həmin sözlərin o dövrdə İsrailin müdafiə naziri Yoav Gallantın açıqlamasına istinad olduğunu bildirib.
61 yaşlı Bonnik antisemitizm iddialarının nüfuzuna zərər verdiyini, buna görə də hüquqi yolla təzminat və işinə bərpa olunma tələb etdiyini açıqlayıb. O, Arsenal rəhbərliyinin ona qarşı antisemitizm ittihamı irəli sürmədiyini, lakin paylaşımının ictimaiyyət tərəfindən "təhqiredici və ya təhrikedici" kimi qəbul oluna biləcəyindən narahat olduqlarını bildirib.
Bonnik qeyd edib ki, illər ərzində futbol, irqçilik və siyasət kimi mövzularda dəfələrlə paylaşım edib, lakin ilk dəfə İsrail haqqında fikir bildirdiyi zaman məsələ problemə çevrilib.
