BAKI, AzerVoice
Etna vulkanında baş verən son püskürmə bölgədə yenidən həyəcan yaradıb.
AzerVoice xəbər verir ki, İtaliyanın
cənubundakı Siciliya adasında yerləşən və Avropanın ən yüksək aktiv
vulkanı olan Etna dağında kül və lava püskürməsi qeydə alınıb.
Təxminən 3300 metr yüksəklikdə yerləşən cənub-şərq kraterindən
sızan maqma nəticəsində güclü lava axınları baş verib.
Vulkanik fəaliyyət dünən axşam saatlarında başlayaraq gecə boyu davam edib və səhər saatlarında sona çatıb. İtaliya Milli Geofizika və Vulkanologiya İnstitutunun (INGV) Kataniya şöbəsi hadisəni təsdiqləyib.
Etnadan yayılan kül buludları yaxınlıqdakı yaşayış məntəqələrinə, xüsusilə Zafferana Etnea qəsəbəsinə düşüb. Külün əsasən şərq və cənub-şərq istiqamətində yayıldığı bildirilib.
Bununla belə, Kataniya Fontanarossa hava limanında uçuşların vulkanik fəaliyyətdən təsirlənmədiyi və aviasiya hərəkətinin normal rejimdə davam etdiyi qeyd olunub.
Qeyd edək ki, bu püskürmə 2025-ci il ərzində Etnada baş verən 13-cü vulkanik hadisədir. Etna dağında bu ilin fevral və aprel aylarında da güclü püskürmələr qeydə alınmışdı.
