BAKI, AzerVoice

Vaşinqtonun ikitərəfli ticarətlə bağlı qərarları Pekini qorxuda bilməyəcək.

AzerVoice xəbər verir ki, bu sözlər Çinin ABŞ-dəki səfiri Se Fenin ABŞ administrasiyasına etdiyi müraciətdə yer alıb.

"Əgər ABŞ bu məsələlərdə danışıqlar aparmaq istəyirsə, Çinlə qarşılıqlı hörmət əsnasında dialoq qurmalıdır" - deyə, səfir qeyd edib.

Sye Fen, gömrük rüsumlarının artırılmasının heç kimə fayda gətirmədiyini bildirib.

"Bu yanaşma biznes mühitini qeyri-sabit edir, xərcləri artırır, maliyyə bazarlarına zərbə vurur və qlobal iqtisadi artımı ləngidir. Tarif müharibəsini Çin başlamayıb və Çin müharibə istəmir. Lakin Çin həm öz qanuni hüquqlarını, həm də beynəlxalq ticarət nizamını qorumaqda qərarlıdır və onu heç kim qorxuda bilməz" - deyə, Se Fen vurğulayıb.

Xatırladaq ki, aprelin 2-də ABŞ Prezidenti Donald Tramp 185 ölkə və əraziyə qarşı yeni gömrük rüsumlarının tətbiq olunduğunu elan edib. Ümumi 10 faizlik tariflər aprelin 5-də qüvvəyə minib, fərdi tariflər isə aprelin 9-da tətbiq edilib. Eyni zamanda Tramp aprelin 9-da bəzi ölkə və ərazilərə qarşı qarşılıqlı prinsip əsasında tətbiq olunmuş əlavə gömrük rüsumlarının 90 gün müddətinə təxirə salındığını bildirib. Ağ Ev bu qərarın ticarət danışıqları aparıldığı üçün verildiyini və bu müddətdə 10 faizlik ümumi tarifin qüvvədə qalacağını bildirib.

Əlavə edək ki, hazırda ABŞ-nin Çin mallarına tətbiq etdiyi ümumi gömrük rüsumları 145 faizə çatıb. Çin isə cavab olaraq aprelin 12-dən etibarən ABŞ məhsullarına tətbiq olunan tarifləri 125 faizə yüksəldib.