BAKI, AzerVoice, Fərid Mikayılov

Meksika Donanmasına məxsus kiçik təyyarənin ABŞ-ın Texas ştatı sahillərində qəzaya uğraması nəticəsində beş nəfər həlak olub.

AzerVoice xəbər verir ki, bu barədə Meksika Donanması rəsmi açıqlama yayıb.

Məlumata görə, təyyarə Texas ştatının Galveston şəhəri yaxınlığında dənizə düşüb.

Açıqlamada bildirilib ki, təyyarədə dörd donanma zabiti və dörd mülki şəxs olmaqla ümumilikdə səkkiz nəfər olub. Qəza nəticəsində beş nəfər həyatını itirib, iki nəfər xilas edilib, bir nəfər isə itkin düşmüş hesab olunur.

Qeyd edilib ki, qəzaya uğrayan təyyarə “xüsusi tibbi daşınma yönümlü humanitar yardım missiyası” çərçivəsində uçuş həyata keçirirmiş. Tibbi müalicə məqsədilə daşınan xəstənin də həlak olanlar arasında olduğu açıqlanıb.

Xilasetmə əməliyyatlarının ABŞ Sahil Mühafizəsi tərəfindən həyata keçirildiyi, təyyarənin okeanda aşkar edildikdən sonra ekipaj üzvlərinin sudan çıxarıldığı bildirilib.

Meksika Xarici İşlər Nazirliyinin məlumatına görə, ölkənin ABŞ-ın Hyuston şəhərindəki Baş Konsulluğu vasitəsilə yerli qurumlarla əlaqə saxlanılıb və həlak olanların ailələrinə müvafiq dəstək göstərilir.