Bakı,AzerVoice, Orxan Qədirzadə

Çinin Tayvanla bağlı hərbi hazırlıqlarının miqyası genişlənir. AzerVoice xəbər verir ki, Pekin mümkün işğal ssenarisi üçün mülki yük və bərə gəmilərini hərbi desant əməliyyatlarını dəstəkləyəcək şəkildə modernləşdirməyə başlayıb.

Məlumata görə, mülki gəmilərin bu məqsədlə hərbiləşdirilməsi, Çinin ənənəvi amfibi donanmasına əlavə olaraq, quru qoşunlarının və hərbi təchizatın dəniz yolu ilə kütləvi daşınmasını təmin etməyə hesablanıb. Bu mexanizmin əsas hədəfi Tayvan limanlarının fəaliyyətinin pozulduğu və ya məhv edildiyi halda əməliyyatların davamlılığını qorumaqdır.

Mütəxəssislər bu strukturlaşdırılan gəmi parkını “kölgə donanması” kimi xarakterizə edir. Peyk görüntüləri və gəmi izləmə sistemlərindən əldə edilən məlumatlar göstərir ki, Çinə məxsus iri yük gəmiləri bu yay keçirilən təlimlərdə sahilə birbaşa hərbi texnika çıxarışını sınaqdan keçirib, gəmilərə gücləndirilmiş rampalar, möhkəmləndirilmiş göyərtələr və sürətli modifikasiya sistemləri quraşdırılıb, Guangdong sahillərində qeydə alınan görüntülərdə nəqliyyat vasitələrinin dənizdən birbaşa qumlu sahilə endirilməsi müşahidə olunub.

Çin-Tayvan xəttində artan hərbi dinamika region ölkələri arasında narahatlıq doğurur. Yaponiyanın Baş naziri Takaichi son açıqlamasında Çinin Tayvana mümkün hücumunun Tokionun hərbi reaksiyasına səbəb ola biləcəyini bəyan edib.

Tayvan isə öz növbəsində mümkün müdaxiləyə qarşı müdafiə hazırlıqlarını intensivləşdirib və ardıcıl hərbi təlimlər keçirir.