BAKI, AzerVoice, Nailə Babazadə

Donald Tramp Çinlə bağlı yeni açıqlaması ilə gündəmə gəlib. O, yaxın iki həftə ərzində Çin Xalq Respublikasının sədri Si Cinpinqlə görüşəcəyini bəyan edib.

AzerVoice xəbər verir ki, Tramp jurnalistlərə verdiyi qısa açıqlamada, “Çin Dövlət Başkanı Si Cinping ilə iki həftə içində görüşəcəyik” deyə bildirib. Onun bu açıqlaması ABŞ-Çin münasibətlərinin son aylarda yenidən gərginləşdiyi bir dövrə təsadüf edir.

Tramp həmçinin Çin mallarına qarşı tətbiq edilən əlavə tariflərlə bağlı da fikir bildirib. “100 faizlik tarif uzun müddət davam etdirilə bilməz, məni bu addımı atmağa vadar etdilər” deyən Tramp, bu addımı zərurətdən atdığını və iqtisadi balansı qorumaq məqsədi daşıdığını qeyd edib.

Hələlik görüşün konkret yeri və tarixi açıqlanmasa da, analitiklər bu görüşün əsas müzakirə mövzularının ticarət münasibətləri, texnologiya transferləri, Tayvan məsələsi və strateji təhlükəsizlik olacağını düşünürlər.

Donald Tramp Çinlə bir sıra iqtisadi qarşıdurmalar yaşamış və "ticarət müharibəsi" ilə yadda qalmışdı. Onun administrasiyası Çin məhsullarına milyardlarla dollar dəyərində əlavə tariflər tətbiq etmiş, Çini "ədalətsiz iqtisadi təcrübələrdə" günahlandırmışdı.

Əgər görüş baş tutarsa, bu, ABŞ-Çin münasibətlərinin gələcək kursunu müəyyən edə biləcək əhəmiyyətli diplomatik hadisə olacaq. Xüsusilə hazırda ABŞ-da prezident seçkilərinə gedilən yolda Donald Trampın xarici siyasətdə atacağı addımlar daha çox diqqət mərkəzindədir.

Həm iqtisadi, həm də geosiyasi baxımdan bu görüşün qlobal bazarlara və beynəlxalq münasibətlərə təsir göstərəcəyi gözlənilir.