BAKI, AzerVoice, Orxan Qədirzadə

İsrail Suriya ərazisindən olan druz icmasının 17 gənc nümayəndəsini fövqəladə hallar və təbii fəlakətlərin nəticələrinin aradan qaldırılması üzrə intensiv təlim proqramına qəbul etməyi planlaşdırır.

AzerVoice xəbər verir ki, İsrailin Yedioth Ahronoth qəzetinin məlumatına görə, üç həftəlik təlim kursu ölkənin milli təhlükəsizlik naziri İtamar Ben-Qvirin nəzarəti ilə həyata keçiriləcək və İsrail Milli Təhlükəsizlik Şurası tərəfindən koordinasiya olunacaq. Təlim zamanı iştirakçılar yanğınsöndürmə və xilasetmə əməliyyatları üzrə müasir simulyatorlardan istifadə edəcəklər.

Proqramın başa çatmasından sonra iştirakçıların Suriyanın Süveyda şəhərinə qayıdaraq təqdim edilən texnika və avadanlıq əsasında yeni yanğın-xilasetmə məntəqəsi yaratmaları planlaşdırılır. Layihə İsrailin “druz icmasına investisiya” adı altında yaxın həftələrdə açıqlanacaq daha geniş proqramının tərkib hissəsidir.

İsrail rəsmiləri bu təşəbbüsün məqsədinin İsrail, işğal altındakı ərazilər və Suriya druzları arasında əlaqələri gücləndirmək olduğunu bildirir.

Qeyd edək ki, İsrail ordusu 2024-cü ilin 8 dekabrında 1967-ci ildən işğal altında olan Colan təpələrinə bitişik buffer zonanı nəzarətə götürərək, hərbi mövqelərini Dəməşqə 20 km-ə qədər yaxınlaşdırıb.

Suriya Prezidenti Əhməd əş-Şəraa bildirib ki, Baas rejiminin devrilməsindən sonra (8 dekabr 2024) İsrail Suriyaya 1000-dən çox hava zərbəsi və 400-dən çox quru hücumu həyata keçirib.

Rəsmi Dəməşq bu müdaxilələrin İsrail tərəfindən “druzların müdafiəsi” adı ilə həyata keçirildiyini, əslində isə Suriyanın suverenliyinin pozulması və işğal zonasının genişləndirilməsi strategiyasının tərkib hissəsi olduğunu bildirir.