BAKI, AzerVoice, Nailə Babazadə

Çin hakimiyyəti ABŞ-ni ölkənin müdafiə siyasətini təhrif etməkdə və bununla da Çinlə Hindistan arasında münasibətlərin yaxşılaşmasının qarşısını almağa çalışmaqda ittiham edib.

AzerVoice xəbər verir ki, Çinin Xarici İşlər Nazirliyinin sözçüsü Lin Tszyan bu açıqlamanı mətbuat brifinqində səsləndirib. O, Vaşinqtonun Çinlə Hindistan arasında mübahisəli sərhəd bölgələri ilə bağlı gərginliyin azalmasından Çinin ABŞ–Hindistan münasibətlərinin dərinləşməsinin qarşısını almaq üçün istifadə edə biləcəyi ilə bağlı iddialara cavab verib.

Lin Tszyan bildirib ki, Çin Hindistanla münasibətlərinə strateji və uzunmüddətli perspektivdən yanaşır. Onun sözlərinə görə, sərhəd məsələsi yalnız Çin və Hindistan arasında olan bir mövzudur və bu məsələyə üçüncü ölkələrin münasibət bildirməsi qəbuledilməzdir.

“Biz hər hansı ölkənin bu məsələ ilə bağlı hökm verməsinə qarşıyıq,” – deyə Çin XİN sözçüsü vurğulayıb.

Qeyd edək ki, ABŞ Müdafiə Nazirliyi (Pentaqon) çərşənbə axşamı yayımladığı hesabatda Çinin sərhəd bölgələrində gərginliyin azalmasından istifadə edərək Hindistanla ikitərəfli münasibətləri sabitləşdirməyə və ABŞ–Hindistan əlaqələrinin daha da dərinləşməsinin qarşısını almağa çalışa biləcəyini iddia etmişdi.