BAKI,AzerVoice,Fərid Mikayılov
ABŞ Prezidenti Donald Tramp Qazaxıstan Prezidenti Kasım-Jomart Tokayevə bir neçə simvolik hədiyyə göndərib. Həmin hədiyyələr arasında Ağ Evin rəmzi açarı və ABŞ Prezidentinin şəxsi avtoqrafı olan beysbol papağı yer alır.
AzerVoice xəbər verir ki, bu barədə Qazaxıstan Respublikası Prezidentinin köməkçisi - mətbuat katibi Ruslan Jeldibay məlumat verib.
Məlumata görə, etimadnamələrin təqdim olunması mərasimindən sonra keçirilən qısa söhbət zamanı Qazaxıstanın ABŞ-dakı yeni səfiri Məğjan İlyasov Prezident Donald Trampla görüşüb. Söhbət zamanı ABŞ lideri cari ilin noyabrında Oval kabinetdə Kasım-Jomart Tokayevlə keçirdiyi görüşlə bağlı təəssüratlarını bölüşüb.
Donald Tramp Qazaxıstan Prezidentinə dərin hörmət bəslədiyini vurğulayıb və Kasım-Jomart Tokayevi “beynəlxalq prosesləri dərindən və ölçülüb-biçilmiş şəkildə dərk edən, təcrübəli dövlət xadimi və gözəl insan” kimi xarakterizə edib.
