BAKI, AzerVoice, Orxan Qədirzadə

Qəzza şəhərində silahlı bir qrupun yaşayış məntəqəsində sakinləri silah hədəsi ilə evlərini tərk etməyə məcbur etdiyi bildirilir.

AzerVoice xəbər verir ki, yerli mənbələrin məlumatına görə, Qəzza şəhərində fəaliyyət göstərən və “Rami Halas Qrupu” kimi tanınan silahlı dəstə cümə axşamı səhər saatlarında şəhərin şərqində yerləşən Tuffah məhəlləsində havaya atəş açıb. Hadisə İsrailin “sarı xətt” adlandırdığı və HƏMAS-ın nəzarətində olan ərazilərlə İsrail mövqelərini ayıran zona yaxınlığında baş verib.

Mənbələr bildiriblər ki, silahlı şəxslər günorta saatlarında əraziyə yenidən qayıdaraq sakinlərə gün batımına qədər evlərini tərk etmələri barədə xəbərdarlıq ediblər. Onlar tələblərə əməl etməyənlərə qarşı silah tətbiq ediləcəyi ilə hədələyiblər.

Silahlı qrupun üzvlərinin sakinlərlə birbaşa təmasdan yayınaraq səsgücləndiricilər vasitəsilə çağırışlar etdiyi qeyd olunur. Onlar köçürülmənin İsrailin göstərişi əsasında həyata keçirildiyini iddia edərək, sakinlərin bir neçə yüz metr aralıda yerləşən digər ərazilərə getməsini tələb ediblər.

Məlumata əsasən, İsrail hərbi bölmələri hadisənin baş verdiyi ərazidən təxminən 150 metr məsafədə yerləşir. Atəşkəsdən sonra evlərinə qayıdan sakinlər hədələrdən sonra Qəzza şəhərinin qərb hissələrinə doğru köçməyə başlayıblar.

Yerli mənbələr 240-dan çox sakinin artıq zədələnmiş evlərini tərk etməyə məcbur qaldığını bildiriblər.

Eyni zamanda qeyd olunub ki, İsrail qüvvələri sözügedən ərazilərə partlayıcı maddə olmayan sarı rəngli çənlər atıb, lakin bu zaman sakinlərə rəsmi təxliyə çağırışı edilməyib.

Mənbələr hesab edirlər ki, silahlı dəstə bu addımı İsrailin bölgəni nəzarətə götürmək planından öncə atıb. Sözügedən ərazi daha əvvəl təhlükəsiz zona kimi elan edilmişdi.

Yerli mənbələr İsrail qüvvələrinin son həftələrdə “sarı xətt” adlanan sərhədi genişləndirmək və Qəzzada yeni əraziləri nəzarətə almaq məqsədilə dolayı üsullardan istifadə etdiyini iddia edirlər.