BAKI, AzerVoice, Orxan Qədirzadə
Türkiyənin ticarət qadağasından sonra İsrailli şirkət iflas edib
AzerVoice xəbər verir ki, İsrailin liman şəhəri Aşdodda fəaliyyət göstərən “Shaul Gueta” adlı dəmir–polad idxal-ixrac şirkəti, Türkiyənin Qəzza hücumlarına cavab olaraq İsrailə qarşı tətbiq etdiyi ticarət embarqosundan sonra iflas edib.
İsrail mediasının məlumatına görə, şirkət ticarət yasağının ardından 105 milyon yeni İsrail şekeli (təxminən 32 milyon ABŞ dolları) məbləğində borca düşüb. Beerşeva (Birüssebi) Regional Məhkəməsi, şirkətin banklara və qeyri-bank maliyyə qurumlarına qarşı öhdəliklərini yerinə yetirə bilmədiyini əsas gətirərək, “Shaul Gueta”nın fəaliyyətini dayandırıb və müəssisəyə qəyyum təyin edilməsi barədə qərar çıxarıb.
Məhkəməyə təqdim edilən 2025-ci ilin avqust tarixli audit hesabatında qeyd olunur ki, şirkət 2022-ci ildə 200 milyon şekel (təxminən 61 milyon dollar) dövriyyə əldə etmişdi. Lakin 2025-ci ilin ilk yarısında bu göstərici cəmi 35 milyon şekelə (təxminən 11 milyon dollar) qədər azalıb.
Şirkət nümayəndələri bildiriblər ki, gəlirin əsas hissəsi Türkiyə bazarından gəlirdi və Türkiyənin İsraillə ticarəti tamamilə dayandırması satış həcmini kəskin şəkildə aşağı salıb. “Şirkətin gəlirinin böyük hissəsi Türkiyə ilə ticarətdən asılı idi. Bu bazarın bağlanması bizi faktiki olaraq dayanma nöqtəsinə gətirdi,” – deyə şirkət rəhbərliyi məhkəmədə bildirib.