BAKI,AzerVoice, Orxan Qədirzadə

İsrail Qəzza zolağında davam edən hərbi əməliyyatların fonunda ölkənin cənubundakı Netivot şəhərində beynəlxalq musiqi festivalı təşkil edəcəyini açıqlayıb.

AzerVoice xəbər verir ki, Muzi Beynəlxalq Musiqi Festivalı 23–26 noyabr tarixlərində Netivotda keçiriləcək və iki illik fasilədən sonra yenidən fəaliyyətə başlayacaq. Festivalın ideya və təşkilati rəhbərliyi “Music Impact” platformasına, bədii rəhbərliyi isə Qal Alteroviçə məxsusdur.

Rəsmi məlumata görə, festival çərçivəsində Fransa, Almaniya, ABŞ və postsovet ölkələrindən ifaçılar səhnə alacaq. Əsas proqram “Musiqi Yolları” konsepti altında Netivot Səhnə Sənətləri Mərkəzində təqdim ediləcək.

Netivot şəhəri Qəzza zolağının mərkəzi hissəsinə təxminən 8 mil (təqribən 13 kilometr) məsafədə yerləşir. Bu səbəbdən festivalın müharibə zonası yaxınlığında keçirilməsi beynəlxalq ictimaiyyətdə etik və humanitar baxımdan tənqidlərə yol açıb.

İsrail mətbuatının yazdığına görə, Netivot Bələdiyyə Konservatoriyasının direktoru Şmuel Elbaz festivalı “simvolik və strateji addım” kimi dəyərləndirib:

“Bu tədbir təkcə musiqi deyil, daha dərin bir mövqenin ifadəsidir.”- o deyib.

Xatırladaq ki, İsrailin son iki ildə Qəzzaya həyata keçirdiyi hava və quru əməliyyatları nəticəsində şəhərin böyük hissəsi dağıdılıb və on minlərlə insan həyatını itirib. BMT və beynəlxalq humanitar təşkilatlar bölgədə kritik vəziyyətin davam etdiyini bildirirlər.