BAKI,AzerVoice, Orxan Qədirzadə
İsrailin 153 nəfərdən ibarət fələstinli qrupu Qəzzadan Cənubi Afrikaya göndərməsi ilə bağlı açıqlaması regionda “sürgün” iddialarını və etnik təmizləmə tənqidlərini yenidən gündəmə gətirib.
AzerVoice-un məlumatına görə, İsrail ordusuna bağlı İşğal Altındakı Fələstin Torpaqlarındakı Hökumət Aktivliklərini Koordinasiya Qurumu (COGAT) yerli mediaya açıqlamasında Qəzza zolağında yaşayan 153 fələstinlinin İsrail tərəfindən Cənubi Afrikaya göndərildiyini təsdiqləyib. Bununla belə, əməliyyatın həyata keçirilmə mexanizmi və sənədləşdirmə qaydaları ilə bağlı qeyri-müəyyənliklər ciddi suallar yaradıb.
Məlumata əsasən, İsrail tərəfi fələstinlilərin göndərildiyi üçüncü ölkə barədə açıqlama verməyib və onların pasportlarına İsraildən çıxış möhürü vurulmayıb. Bu səbəbdən 153 nəfərlik qrup Yohannesburqa çatan kimi təxminən 12 saat ərzində giriş nəzarətində gözləməli olub.
Hələlik İsrail Baş Nazirliyinin və Xarici İşlər Nazirliyinin hadisəyə dair rəsmi mövqeyi açıqlanmayıb. Bu susqunluq, iki ildir Qəzzaya qarşı davam edən hərbi əməliyyatlar fonunda “Filistinliləri başqa ölkələrə çıxarma yolu ilə etnik təmizləmə həyata keçirilməsi” ilə bağlı beynəlxalq tənqidlərin artmasına səbəb olub.
“Haaretz” qəzetinin məlumatına görə, fələstinlilər Kərəm Əbu Salim keçid məntəqəsindən İsrailə daxil edilib və oradan avtobuslarla Eylat şəhərindəki Ramon hava limanına daşınıb. Qrup daha sonra Kenya paytaxtı Nayrobiyə, ordan isə Yohannesburqa uçub.
İsrailli hərbi rəsmilər “Əl-Məcd” adlı təşkilatın həmin şəxsləri sərhəd-keçid məntəqəsinə gətirdiyini, İsrail ordusunun isə yalnız Ramon hava limanına qədər müşayiət etdiyini bildirir. Cənubi Afrikadakı bir sıra QHT-lər isə bu qurumun İsrail strukturları ilə əlaqəli olduğunu və Qəzzadan sistemli şəkildə insan çıxarılması prosesində rol oynadığını iddia edir.
Yohannesburq hava limanında pasportlarında çıxış möhürü olmadığı üçün gözlədilən fələstinlilər dünən Cənubi Afrika Respublikası tərəfindən ölkəyə buraxılıb. Cənubi Afrikanın humanitar təşkilatı “Gift of the Givers”in müvəqqəti sığınacaq təmin edəcəyini bildirməsindən sonra 13 saatlıq gözləmə başa çatıb və qrup müvəqqəti mühacir statusu ilə ölkəyə qəbul edilib.
Hadisə beynəlxalq ictimaiyyətin diqqətini yenidən Qəzzadakı humanitar vəziyyətə və mülki əhalinin məcburi köçürülməsi iddialarına yönəldib.