BAKI, AzerVoice, Orxan Qədirzadə

“HƏMAS” hərəkatının sözçüsü Həzəm Qasım bazar ertəsi bildirib ki, İsrail atəşkəs razılaşmasını davamlı şəkildə pozmaqda sabit bir siyasət yeridir. O, bölgədə sakitliyin davam etməsini istəyən bütün tərəfləri İsrailə təzyiq göstərməyə çağırıb ki, bu ölkə öhdəliklərini yerinə yetirsin.

Qasım “HƏMAS” tərəfindən yayılan bəyanatda deyib: “Hərəkat, İsrailin davam edən pozuntuları ilə bağlı vasitəçilərlə daimi təmasdadır və işğalçı rejimin bilərəkdən törətdiyi qanun pozuntuları barədə ABŞ tərəfi ilə də mütəmadi əlaqə saxlayır.”

“HƏMAS” sözçüsü qeyd edib ki, hərəkat Qəzzadakı atəşkəs razılaşmasının bütün detallarına əməl edib. Onun sözlərinə görə, bu, xüsusilə birinci mərhələdə – israilli əsirlərin hamısının sağ halda bir dəfəyə təhvil verilməsi ilə həyata keçirilib.

Qasım əlavə edib: “Biz hər gün israilli əsirlərin cəsədlərinin təhvil verilməsini tamamlamaq üçün çalışırıq,” - deyə bildirib və Qəzza zolağında genişmiqyaslı dağıntılar səbəbindən bu prosesdə ciddi çətinliklərin olduğunu vurğulayıb.