BAKI, AzerVoice
Suriya Daxili İşlər Nazirliyi cümə axşamı günü İŞİD terror təşkilatının ölkənin şimalındakı Hələb şəhərində Yeni il bayramı münasibətilə mülki əhali və kilsələrə qarşı planlaşdırdığı terror aktlarının qarşısının alındığını bəyan edib.
Nazirliyin açıqlamasında bildirilir ki, əldə olunan kəşfiyyat məlumatlarına əsasən, İŞİD üzvləri bir sıra əyalətlərdə, xüsusilə Hələb şəhərində intihar hücumları və silahlı basqınlar həyata keçirməyi planlaşdırıb. Hədəflər arasında Yeni il qeyd etmələrinin keçirildiyi mülki toplaşma yerləri və kilsələr olub.
Daxili İşlər Nazirliyi qeyd edib ki, bu məlumatlar terrorla mübarizə istiqamətində aparılan davamlı fəaliyyət, İŞİD-in hüceyrə şəbəkələrinin hərəkətlərinin dəqiq izlənilməsi və tərəfdaş qurumlarla aparılan kəşfiyyat əməkdaşlığı nəticəsində əldə edilib.
Nazirliyin açıqlamasına görə, təhlükənin qarşısını almaq məqsədilə qabaqlayıcı təhlükəsizlik tədbirləri görülüb. Bu tədbirlər çərçivəsində kilsələrin ətrafında mühafizə gücləndirilib, daimi və səyyar patrul xidmətləri təşkil olunub, şəhərin müxtəlif bölgələrində yoxlama-keçid məntəqələri qurulub.
Hələb hadisəsi: terrorçu özünü partlatdı
Nazirlik bildirib ki, çərşənbə axşamı axşam saatlarında Hələbin Bab əl-Fərəc bölgəsində yerləşən nəzarət-buraxılış məntəqəsində polis əməkdaşlarından biri şübhəli şəxsə diqqət yetirib. Sonradan həmin şəxsin İŞİD üzvü olduğu müəyyən edilib.
Şəxsin kimliyi yoxlanılarkən o, polis əməkdaşlarına atəş açıb, nəticədə bir polis əməkdaşı həlak olub. Daha sonra terrorçu özünü partladıb, hadisə zamanı onu zərərsizləşdirməyə çalışan iki polis əməkdaşı yaralanıb.
Daxili İşlər Nazirliyi açıqlamasında qeyd edib ki, təhlükəsizlik qüvvələrinin göstərdiyi bu “qəhrəmanlıq” sayəsində mülki əhalinin həyatını hədəf alan ciddi terror planının qarşısı alınıb.
Xatırladaq ki, Suriya ötən ilin noyabr ayında ABŞ-ın rəhbərliyi ilə 2014-cü ildə yaradılmış beynəlxalq anti-İŞİD koalisiyasına qoşulub. Koalisiya çərçivəsində İŞİD-ə qarşı Suriya və İraq ərazisində hərbi əməliyyatlar həyata keçirilib, lakin devrilmiş prezident Bəşər Əsədin hakimiyyəti dövründə Suriya bu koalisiyaya qoşulmamışdı.
2024-cü il dekabrın 8-də suriyalı müxalif qüvvələr Dəməşqə daxil olaraq, 2000–2024-cü illərdə hakimiyyətdə olan Bəşər Əsəd rejiminin devrildiyini elan ediblər.
Hazırda Suriyanın yeni administrasiyası ölkədə təhlükəsizliyin təmin olunması, dövlət nəzarətinin bərpa edilməsi, müharibənin ağır nəticələrinin aradan qaldırılması və bərpa prosesinin sürətləndirilməsi istiqamətində intensiv tədbirlər həyata keçirir.