BAKI, AzerVoice, Nailə Babazadə
Kreml sözçüsü Dmitri Peskov, Rusiya Prezidenti Vladimir Putinin, ABŞ Prezidenti Donald Trampla paytaxt Moskvada görüşməyə hazır olduğunu açıqlayıb.
AzerVoice xəbər verir ki,Peskov, Putinin Trampı Alyaskadakı zirvə zamanı Moskvaya dəvət etdiyini xatırladıb.Peskov, bu təklifin qüvvədə olduğunu bildirib.
Rusiyanın, İngiltərə və Fransanın nüvə arsenalının da nəzərə alınması ilə bağlı tələbinin hələ də qüvvədə olub-olmadığına dair sualı cavablandıran Peskov, bu mövzunun aktual olduğunu bildirib.
Peskov, əvvəlcə Rusiya və ABŞ arasında Yeni Strateji Silahların Azaldılması Müqaviləsi (New START) ilə bağlı danışıqların başlanmasının vacibliyini vurğulayaraq, “Ancaq gələcəkdə nüvə arsenalı məsələsi də müzakirəyə çıxarılmalıdır. Bu arsenal Avropanın təhlükəsizliyi və strateji sabitliyi ilə bağlı məsələnin tərkib hissəsidir,” deyib.
Qeyd edək ki, Rusiya Prezidenti Putin ilə ABŞ Prezidenti Tramp, avqust ayında Alyaskanın Anchorage şəhərində yerləşən Elmendorf-Richardson hərbi bazasında bir araya gəlmişdilər.
Putin, Trampa növbəti zirvənin Moskvada keçirilməsi təklifini vermiş, Tramp isə bunun mümkün olduğunu bildirmişdi.
