BAKI, AzerVoice, Səməd Əyyubov
Paris Cinayət Məhkəməsinin İnsanlığa Qarşı Cinayətlər üzrə Bölməsi Suriyanın Hums vilayətində 2012-ci ildə baş verən hücumla bağlı qərar qəbul edib.
AzerVoice-un məlumatına görə, məhkəmə devrilmiş BƏƏS rejiminin lideri Bəşşar Əsədin də aralarında olduğu yeddi keçmiş yüksək vəzifəli şəxs barəsində həbs orderi verib.
Bildirilib ki, adıçəkilən şəxslər fransalı və xarici jurnalistlər Remi Oşlik, Edit Buvye, Meri Kolvin, Pol Konroy və tərcüməçi Vail əl-Omarın əleyhinə müharibə və insanlığa qarşı cinayətlərdə ittiham olunurlar.
Suriya Mətbuat və Söz Azadlığı Mərkəzinin rəhbəri Mazin Dərviş qeyd edib ki, aparılan istintaq həmin hücumun devrilmiş BƏƏS rejiminin ölkədə törətdiyi cinayətlərin işıqlandırılmasını məhdudlaşdırmaq məqsədilə xarici jurnalistləri hədəfə aldığını ortaya qoyur.
Qeyd edək ki, 2012-ci il fevralın 22-də Humsun Baba Amr məhəlləsində yerləşən mətbuat mərkəzinə edilən hücum zamanı bir sıra fransalı və xarici jurnalist yaralanıb, bəziləri isə həyatını itirib.