BAKI, AzerVoice , Nərmin Ağayeva

İsrailin 6 günlük hücumunda Qəzza şəhərində 400 ev dağıdılıb.

AzerVoice xəbər verir ki, Cenevrədə fəaliyyət göstərən Avro-Aralıq dənizi İnsan Haqları Monitoru (Euro-Med) Qəzzanın Zeytun məhəlləsində baş verən son hücumları qiymətləndirib. Açıqlamada bildirilir ki, İsrail altı gün ərzində uzaqdan idarə olunan partlayıcılar, hava hücumları və artilleriya atəşi ilə təxminən 400 evi dağıdıb və 90 mindən çox sakini məcburi köçkün edib.

Euro-Med həmçinin bildirib ki, məktəblər və məscidlər də hücumların hədəfi olub və dağıntılar altında qalan ölü və yaralıların çıxarılması mümkün olmayıb. Təşkilatın açıqlamasında bu hücumların Qəzzanı tamamilə işğal etmək və məhəllələri boşaltmaq məqsədilə həyata keçirildiyi, sistemli soyqırım siyasətinə uyğun olduğu vurğulanıb.

Qeyd edək ki, İsrail Təhlükəsizlik Kabineti avqustun 8-də Qəzza şəhərinin şimalında işğal planını təsdiqləyib və Baş nazir Benyamin Netanyahu Nazirlər Kabinetinin iclasından əvvəl şəhərin hamısını işğal etməyi hədəflədiklərini açıqlayıb.