BAKI, AzerVoice, Nailə Babazadə
Rusiya Xarici İşlər Naziri Sergey Lavrov, ABŞ Prezidenti Donald Trampın Rusiya Prezidenti Vladimir Putinlə Alyaskada keçirəcəyi görüş öncəsi danışıqların uğursuzluqla nəticələnə biləcəyi ehtimalına münasibət bildirib.
AzerVoice xəbər verir ki, Rusiya XİN -in yaydığı açıqlamaya görə, Lavrov Alyaskada jurnalistlərin suallarını cavablandırarkən Trampın görüşün uğursuzluqla nəticələnmə ehtimalının 25 faiz olduğunu deməsinə toxunub.
“Biz heç vaxt proqnoz vermirik. Bizim aydın arqumentlərimiz və mövqeyimiz var. Bunu izah edəcəyik.” - deyə Lavrov qeyd edib.
Nazir əlavə edib ki, ABŞ Prezidentinin xüsusi nümayəndəsi Stiven Uitkoff Moskvaya səfərləri zamanı bir çox məsələlər müzakirə olunub. Lavrov həmçinin qeyd edib ki, Vitkoff bu mövqeləri həm Putin, həm də Tramp adından ifadə edib.
“Ümid edirəm ki, sabah bu faydalı dialoqu davam etdirəcəyik,” – deyə Lavrov əlavə edib.
Qeyd edək ki, bu gün Alyaskada ABŞ prezidenti Donald Tramp və Rusiya prezidenti Vladimir Putin arasında keçiriləcək sammit, Ukrayna müharibəsinə son qoymaq üçün 7 aydır davam edən danışıqların ən kritik mərhələsi hesab olunur. Danışıqlardan atəşkəs qərarı çıxarsa, növbəti mərhələdə Ukrayna prezidenti Volodimir Zelenskinin də qatılacağı üçtərəfli sammitin İstanbulda keçirilməsi nəzərdə tutulur.
Putin görüşə xarici siyasət üzrə köməkçisi Yuri Uşakov, XİN rəhbəri Sergey Lavrov, müdafiə naziri Andrey Belausov, xarici investisiyalar üzrə köməkçisi Kiril Dmitriyev və maliyyə naziri Anton Siluanov kimi yüksək səviyyəli nümayəndələrlə qatılacaq. Analitiklər bu heyətin mövcudluğu danışıqlardan konkret nəticə gözləntilərini gücləndirir.
Tramp Avropa liderləri ilə videokonfrans zamanı bildirib ki, Putin atəşkəsi qəbul edərsə, dərhal Rusiya-Ukrayna liderləri ilə yeni görüş keçirməyi planlaşdırır. Bu sammitin Türkiyə prezidenti Rəcəb Tayyib Ərdoğanın ev sahibliyi ilə İstanbulda keçirilməsi həm coğrafi, həm də diplomatik baxımdan əlverişli hesab olunur. İstanbul əvvəllər də (2022-ci ildə və sonrakı aylarda) tərəflər arasında birbaşa danışıqlara ev sahibliyi edib.