BAKI, AzerVoice, Nərmin Ağayeva

Harvard Universiteti ilə ABŞ hökuməti federal tədqiqat maliyyəsinin bərpası üçün 500 milyon dollar xərclənməsini nəzərdə tutan qanuni razılaşmaya yaxınlaşır.

AzerVoice xəbər verir ki, New York Times-ın mənbələrinə görə, Ağ Ev və universitet rəsmiləri qapalı danışıqlarda irəliləyiş əldə edib, razılaşma çərçivəsi üzərində işləyirlər. Harvard, federal hökumətin tələb etdiyi kimi peşəkar təhsil və tədqiqat proqramlarına bu məbləği xərcləməyə hazırdır. Universitet həmçinin kampusda antisemitizmə qarşı mübarizəni davam etdirməyi öhdəsinə götürüb.

Razılıq əldə olunarsa, Tramp administrasiyası universitetlə bağlı araşdırmaları dayandıracaq və Harvardın tədqiqat fondlarına çıxışı bərpa olunacaq. Bu, həmçinin universitetin qarşı çıxdığı bir nəzarətçinin təyin olunması tələbini aradan qaldıracaq.

Qeyd edək ki, Tramp administrasiyası federal maliyyələşdirməni Fələstin məsələsi və müxtəliflik proqramlarına dəstək iddiaları ilə dondurmuş, Harvard da bu qərarın qanunsuz olduğunu bildirərək məhkəməyə müraciət etmişdi.