BAKI, AzerVoice, Səməd Əyyubov
Birləşmiş Millətlər Təşkilatının (BMT) Baş katibi Antonio Quterreş, Qəzzada fəaliyyət göstərən 6 fələstinli jurnalistin İsrail ordusu tərəfindən öldürülməsini pisləyib.
AzerVoice xəbər verir ki, bu barədə BMT Baş katibinin sözçüsü Stefan Düjarrik bildirib.
"Baş katib, avqustun 10-da Qəzza şəhərində İsrailin hava hücumunda 6 fələstinli jurnalistin öldürülməsini qınayıb. Bu son qətllər, jurnalistlərin qarşılaşmağa davam etdikləri riskləri bir daha göstərir" - deyə, Düjarrik qeyd edib.
O, bu hadisələrlə bağlı müstəqil və qərəzsiz araşdırma aparılmasının zəruriliyini vurğulayıb və 7 oktyabr 2023-cü ildən bəri İsrailin Qəzzada öldürdüyü jurnalistlərin sayının 242-yə çatdığını açıqlayıb.
O, jurnalistlərə və media işçilərinə hörmət göstərilməli, qorunmalı, işlərini azad şəkildə, qorxu və təzyiqdən uzaq icra etmələrinə imkan yaradılmalı olduğunu vurğulayıb.
Xatırladaq ki, ötən gün axşam saatlarında İsrailin Qəzzadakı Şifa Xəstəxanası yaxınlığında yerləşən mətbuat çadırına təşkil etdiyi hava hücumu nəticəsində "Al Jazeera" telekanalının 6 müxbiri həlak olub.
