BAKI, AzerVoice, Səməd Əyyubov

Fransa prezidenti Emmanuel Makron İsrailin Qəzzanı işğal etmək qərarına sərt reaksiya verərək bu qərarı “misilsiz bir fəlakətin başlanğıcı” kimi qiymətləndirib.

AzerVoice xəbər verir ki, bu barədə Makron BFMTV-yə müsahibəsində danışıb.

O, Qəzzadakı mülki əhalinin və HƏMAS-ın Qəzzada saxladığı girovların bu strategiyanın əsas qurbanı olmağa davam edəcəyini vurğulayıb və BMT mandatı altında beynəlxalq koalisiya yaradılması təklifini irəli sürüb.

“İsrailin hərbi əməliyyatları dayandırılmalıdır. Terrorla mübarizə, Qəzzada sabitlik yaratmaq, əhalini dəstəkləmək və sülhü təmin edən idarəetməni qurmaq üçün BMT mandatı altında beynəlxalq koalisiya qurulmalıdır” - deyə, Makron bildirib.

O əlavə edib ki, məsələni BMT Təhlükəsizlik Şurasının (BMT TŞ) gündəminə çıxarmaq üçün tərəfdaşları ilə birgə çalışacaqlar. Onun sözlərinə görə, bu addım Qəzza sakinləri və girovlar üçün qəbulolunmaz vəziyyətdən çıxışın yeganə etibarlı yoludur.

Xatırladaq ki, avqustun 8-də İsrail Təhlükəsizlik Kabineti Qəzza şəhərinin işğalı planını təsdiqləyib. Həmin gün İsrailin baş naziri Binyamin Netanyahu "Fox News"-a açıqlamasında Qəzza zolağının tam işğalını hədəflədiklərini bildirib. Planın mərhələli şəkildə icra ediləcəyi, əvvəlcə Qəzza şəhərindən, daha sonra isə mərkəzdəki fələstinli qaçqın düşərgələrindən başlanacağı qeyd olunub.