BAKI, AzerVoice, Səməd Əyyubov

Avropanın Ukrayna münaqişəsinin həlli prosesində fəal iştirak etməsi vacibdir.

AzerVoice xəbər verir ki, bu fikri Fransa Prezidenti Emmanuel Makron, Böyük Britaniyanın Baş naziri Kir Starmer, Almaniya kansleri Fridrix Merts və Ukrayna Prezidenti Volodimir Zelenski ilə telefon danışığından sonra səsləndirib.

“Ukraynanın gələcəyi, ukraynalıların iştirakı olmadan müəyyənləşdirilə bilməz. Avropalılar da bu həllin mütləq bir hissəsi olacaqlar, çünki söhbət onların öz təhlükəsizliyindən gedir” - deyə, Makron "X" sosial şəbəkəsində yazıb.

O, həmçinin əlavə edib ki, Paris, Berlin və London “istəkli dövlətlər koalisiyası” çərçivəsində görülən işlərə əsaslanaraq Ukraynaya dəstəyi davam etdirməyə qərarlıdırlar.

Bundan əvvəl, ABŞ Prezidenti Donald Tramp avqustun 15-də ABŞ-ın Alyaska ştatında Rusiya Prezidenti Vladimir Putinlə görüşünün keçirilməsinin planlaşdırıldığını açıqlamışdı. Görüşün vaxtını və yerini sonradan Rusiya Prezidentinin köməkçisi Yuri Uşakov da təsdiqləyib. Onun sözlərinə görə, Putin və Tramp “şübhəsiz ki, Ukrayna böhranının uzunmüddətli, sülh yolu ilə həll variantlarının müzakirəsinə diqqət yetirəcəklər”. Uşakov əlavə edib ki, Kreml Alyaskadakı danışıqlardan sonra iki liderin növbəti görüşünün Rusiya ərazisində keçiriləcəyini gözləyir.