BAKI, Azervoice, Nərmin Ağayeva

İsrailin Qəzzanı işğal etmək qərarı nəticəsində 1 milyon fələstinli yenidən məcburi köçkünlə üzləşəcək.

Azervoice xəbər verir ki, Təhlükəsizlik Kabinetinin baş nazir Benyamin Netanyahunun rəhbərliyi altında Qəzza şəhərinin işğal planını təsdiqləməsi Qəzza zolağının şimalında yaşayan təxminən 1 milyon fələstinlinin məcburi köçkün vəziyyətinə düşməsinə səbəb olacaq. Hazırda 2,3 milyon fələstinli isə zolağın mərkəzi hissəsində dar və infrastrukturdan məhrum bir ərazidə məskunlaşmağa məcburdur.

İsrailin işğal planı şimalda “təxliyə əmrləri” ilə fələstinliləri zorla köçürməyə yönəlib, ancaq ordunun bəzi rəsmilərinin bu planın tam Qəzza zolağına yayılmasına qarşı çıxması, eləcə də israilli məhbusların təhlükəsizliyi ilə bağlı narahatlıqlar planın hələ Qəzza şəhəri ilə məhdudlaşmasına səbəb olub.

Fələstinlilər işğal və ağır hücumlar altında yenidən didərgin düşərək mərkəzi bölgələrdə daha sıx şəraitdə yaşamaq məcburiyyətində qalacaq. BMT-nin açıqlamalarında da vurğulandığı kimi, bölgədə təhlükəsiz yer yoxdur və hava zərbələri mərkəzi ərazilərə də endirilir.

Qeyd edək ki, İsrail mediasında yayılan xəbərlərə görə, işğal mərhələli şəkildə genişlənəcək və ilk mərhələdə Qəzza şəhərində başlayacaq hücumlar daha sonra digər ərazilərə yayılacaq.