BAKI, AzerVoice, Səməd Əyyubov
HƏMAS, ABŞ-ın Yaxın Şərq üzrə xüsusi nümayəndəsi Stiven Uitkoffun ötən gün Qəzza zolağına etdiyi səfəri kəskin şəkildə tənqid edərək, bu səfəri “əvvəldən səhnələşdirilmiş bir tamaşa” adlandırıb.
AzerVoice xəbər verir ki, bu barədə HƏMAS-ın yayımladığı bəyanatda deyilir.
Bildirilib ki, Uitkoffun Qəzzaya səfərinin məqsədi ictimai rəyə təsir göstərmək, İsrailin imicini təmizləmək və bölgədə tətbiq olunan aclıq siyasətinə siyasi əsas qazandırmaqdır.
Bəyanatda vurğulanıb ki, Uitkoffun “Qəzza Humanitar Fondu” (GHF) tərəfindən idarə olunan yardım paylama mərkəzlərinə səfəri, yalnız ictimaiyyəti çaşdırmaq və İsrailə sistematik qətliam və aclıq siyasətini davam etdirmək üçün siyasi əsas qazandırmaq məqsədi daşıyan səhnələşdirilmiş bir tamaşadır.
HƏMAS qeyd edib ki, Uitkoffun verdiyi açıqlamalar və səfər zamanı yayımlanan görüntülər reallığa ziddir.
HƏMAS ABŞ administrasiyasını Qəzzada baş verən cinayətə ortaq olmaqda ittiham edib və Vaşinqtonu üzərinə düşən tarixi məsuliyyəti daşımağa çağırıb.
“ABŞ bu cinayətə verdiyi siyasi dəstəyi dayandırmalı, atəşkəsə və işğalçı qüvvələrin Qəzzadan çıxmasına, mühasirənin qaldırılmasına yönəlmiş bir razılaşma istiqamətində hərəkət etməlidir” - deyə, bəyanatda vurğulanıb.
Qeyd edək ki, Uitkoff bu gün Tel-Əvivdə HƏMAS tərəfindən saxlanılan israilli girovların ailələri ilə görüşündə Qəzzada aclığın olmadığını və müharibəni genişləndirmək yox, bitirmək niyyətində olduqlarını bildirmişdi. Onun sözlərinə görə, hazırda danışıqlar müharibənin bitməsi və bütün girovların geri qaytarılması üzərində cəmlənməlidir, qismən razılaşmalarla vaxt itirilməməlidir.
