BAKI, AzerVoice

Böyük Britaniya, İsrailin Qəzza zolağında humanitar yardımın çatdırılmasına mane olacağı halda, sentyabr ayında BMT Baş Assambleyasının sessiyası ərəfəsində Fələstin dövlətini tanıyacağını bəyan edib.

AzerVoice xəbər verir ki, bu barədə Böyük Britaniyanın Baş naziri Kir Starmerin dəftərxanası açıqlama verib.

“Biz iki dövlətli həllin reallaşdırılması imkanını qoruyub saxlamaqda qətiyyətliyik. Bu səbəbdən, əgər İsrail hökuməti Qəzzada hökm sürən dəhşətli vəziyyətə son qoymaq və davamlı sülhə nail olmaq üçün ciddi addımlar atmasa – o cümlədən BMT-nin aclığın qarşısını almaq məqsədilə təcili humanitar yardım missiyasını bərpa etməsinə imkan verməsə, atəşkəslə razılaşmasa və İordan çayının qərb sahilində ilhaq planlarından imtina etməsə – biz sentyabr ayında BMT Baş Assambleyasından əvvəl Fələstin Dövlətini rəsmən tanıyacağıq.” - deyə, açıqlamada bildirilib.

Qeyd edək ki, Fələstin BMT-nin 148 üzv dövləti tərəfindən tanınıb. 95 ölkədə Fələstinin səfirlikləri və daimi nümayəndəlikləri fəaliyyət göstərir. “İki dövlət – iki xalq üçün” prinsipi 1967-ci il sərhədləri daxilində, paytaxtı Şərqi Qüds olan müstəqil Fələstin dövlətinin yaradılmasını nəzərdə tutur.