BAKI, AzerVoice
HƏMAS Qəzzada saxlanılan girovların azad olunması ilə bağlı təklifi qəbul etməkdən hələ də imtina edir və Qəzzadakı vəziyyətin nizamlanması üzrə danışıqlarda yerinə yetirilməsi mümkün olmayan şərtlər irəli sürür.
AzerVoice xəbər verir ki, bu barədə İsrail hökumətinin rəsmi nümayəndəsi David Menser brifinq zamanı bildirib.
“HƏMAS inadkarlıqla girovların azad olunması ilə bağlı təklifdən imtinasını davam etdirir və qəbuledilməz şərtlər irəli sürür” – deyə, o qeyd edib.
“Son məlumata əsasən, İsrail hələ də vasitəçilər vasitəsilə HƏMAS-dan rəsmi cavabı gözləyir. Amma indi deyə bilərəm ki, HƏMAS İsrailin artıq qəbul etdiyi təklifdən hələ də imtina edir” – deyə, Menser əlavə edib.
Nazirlər Kabinetinin nümayəndəsi bildirib ki, İsrailin nümayəndə heyəti hələ də Dohadadır.
“Bu danışıqlar davam edir və davam edəcək, çünki məqsədimiz girovları evə qaytarmaqdır. Biz fəaliyyətimizi ABŞ ilə koordinasiya edirik. Baş nazir Benyamin Netanyahu, ABŞ Prezidenti Donald Trampla və eləcə də onun xüsusi nümayəndəsi Stiven Uitkoffla əlaqə saxlayır” – deyə, o qeyd edib.
Menser brifinq zamanı həmçinin xatırladıb ki, HƏMAS hələ də Qəzza zolağında 50 girovu saxlayır. İsrail tərəfinin məlumatına görə, onlardan 20-si sağdır.
“Onlar dərhal azad olunmalıdır – nə sabah, nə yaxın gələcəkdə, məhz indi”, – deyə o əlavə edib.
Qeyd edək ki, İsrail mətbuatının yazdığına görə, Qətər və Misir HƏMAS nümayəndələrindən Qəzza ilə bağlı son təklifə cavabı iyulun 22-si alıblar. Mənbələrin sözlərinə görə, bu cavab “vasitəçilərin özlərini də qane etməyib” və onlar bu cavabı “rədd edərək, HƏMAS-dan daha uyğun bir yanaşma üzərində işləməyi tələb ediblər”.
