BAKI, AzerVoice

ABŞ-ın UNESCO-dan çıxmaq qərarı almasına baxmayaraq, Fransa bu təşkilata dəstəyini davam etdirmək niyyətindədir.

AzerVoice xəbər verir ki, bu barədə Fransa prezidenti Emmanuel Makron “X” sosial şəbəkəsində yazıb.

“Elm, təhsil, mədəniyyət və dünya irsinin universal müdafiəçisi olan UNESCO-ya davamlı dəstək verəcəyik. ABŞ-ın təşkilatdan çıxması bizim bu mübarizəyə rəhbərlik edənlərə sadiqliyimizi zəiflətməyəcək” - deyə, Makron vurğulayıb.

Xatırladaq ki, bugün ABŞ prezidenti Donald Tramp ölkəsinin UNESCO-dan çıxması barədə qərar verib. Vaşinqton bu qərarı təşkilatın "ABŞ-ın maraqlarına uyğun olmayan təşəbbüsləri dəstəkləməsi" ilə əsaslandırıb.

Qeyd edək ki, ABŞ UNESCO-dan ilk dəfə çıxmır: 1984-cü ildə sabiq prezident Ronald Reyqan administrasiyası təşkilatı tərk etmişdi. O zaman əsas səbəblər kimi UNESCO-nun “həddindən artıq siyasiləşməsi” və “büdcənin qeyri-səmərəli istifadəsi” göstərilmişdi. ABŞ yalnız 2003-cü ildə təşkilata qayıtmışdı. Lakin Tramp 2018-ci ildə prezidentliyinin ilk dövründə UNESCO-dan yenidən çıxma qərarı vermişdi. ABŞ bu addımı UNESCO-da artan borclar, fundamental islahatların zəruriliyi və İsrailə qarşı qərəzin davam etməsi ilə izah etmişdi. Sonuncu dəfə ABŞ 2023-cü ildə təşkilata yenidən üzv olmuşdu.

İsrail də UNESCO ilə uzun illərdir mübahisələr yaşayırdı. Bu mübahisələrin əsas səbəbi Qüdsün statusu və Fələstin ərazilərindəki qorunan obyektlərin tanınması idi. 2017-ci ildə İsrail təşkilatı tərk etmək qərarına gəldi və 2018-ci ildə ABŞ-la birlikdə üzvlüyünü dayandırdı. Bununla belə, İsrail ərazisində yerləşən və UNESCO-nun Dünya İrsi Siyahısına daxil edilmiş obyektlərin statusu qüvvədə saxlanılıb.