BAKI,AzerVoice
“Sənaye 4.0 Hazırlıq” Proqramı çərçivəsində 15 müəssisədə texnoloji və dayanıqlı inkişaf üzrə hazırlıq səviyyəsi qiymətləndirilib.
AzerVoice xəbər verir ki, İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM) tərəfindən həyata keçirlən “Sənaye 4.0 Hazırlıq” Proqramına qoşulan 15 müəssisədə qiymətləndirilmə prosesi başa çatıb.
Qiymətləndirmə nəticəsində müəssisələrin texnoloji transformasiya və dayanıqlı inkişaf üzrə hazırlıq səviyyələri təhlil edilib. Proses ərzində yerli və beynəlxalq mütəxəssislərin iştirakı ilə müəssisələrin hər birində yerində qiymətləndirmələr aparılıb. İstehsal prosesləri, əməliyyatların idarə edilməsi, texnoloji infrastruktur, avtomatlaşdırma səviyyəsi və rəqəmsallaşma göstəriciləri qeydə alınıb. Bununla yanaşı, müəssisələrdə enerji səmərəliliyi, resursların idarə olunması, tullantıların optimallaşdırılması, sosial məsuliyyət və korporativ idarəetmə sahələri üzrə mövcud vəziyyət araşdırılıb.
Qiymətləndirmə nəticələrinə əsasən biznes subyektlərinə transformasiya üzrə fərdi yol xəritələri təqdim edilib. Yol xəritələrinin icrası müəssisələrin daha çevik, məlumatlara əsaslanan və dayanıqlı istehsal mühitinə keçidini sürətləndirəcək.
“Sənaye 4.0 Hazırlıq” Proqramı İqtisadiyyat Nazirliyinin dəstəyi ilə “Azərbaycan Respublikasında rəqəmsal iqtisadiyyatın inkişafına dair 2026-2029-cu illər üçün strategiya” çərçivəsində “Rəqəmsal İqtisadiyyatın İnkişafına Dəstək Proqramı” tədbiri çərçivəsində həyata keçirilir. Bu proqram Azərbaycan sənayesində texnoloji transformasiyanın təşviqi, innovasiya əsaslı istehsal modellərinin tətbiqi, əməliyyat səmərəliliyinin yüksəldilməsi və rəqəmsallaşma imkanlarının genişləndirilməsi məqsədi daşıyır. Proqrama qoşulan müəssisələr beynəlxalq metodologiya əsasında qiymətləndirilir və bu müəssisələrin hər biri üçün inkişafla bağlı fərdi yol xəritəsi hazırlanır. Yol xəritələrinin icrası zamanı ekspert və maliyyə dəstəyinin göstərilməsi nəzərdə tutulub.
Qeyd edək ki, proqrama metallurgiya, tikinti materialları, qida sənayesi, yüngül sənaye və pərakəndə ticarət sahələrində fəaliyyət göstərən 15 müəssisə qoşulub. Proqram iştirakçıları sırasında “STP Aluminium”, “Azəralüminium”, “Norm Sement”, “Unimetal”, “Ulduz” şokolad fabriki, “Sun Tea”, “Azəri Taxıl”, “Azərsüd”, “OBA” və “Araz” marketlər şəbəkələri, həmçinin “KonstraLab Industries”, “Azertexnolayn” və digər müəssisələr yer alır.
Daha əvvəl proqramın pilot mərhələsində iştirak etmiş “METAK”, “Azerfloat” və “STP Global Cable” şirkətləri hazırda yol xəritələrinin icrasını həyata keçiririlər.
