BAKI, AzerVoice
İran İslam Respublikası ABŞ-ın Kubaya qarşı tətbiq etdiyi yeni sanksiyalara sərt reaksiya verib.
AzerVoice xəbər verir ki, İran Xarici İşlər Nazirliyinin sözçüsü İsmayıl Bəqai Vaşinqtonun bu addımını “zorakılıq və məcburetmə siyasətinin növbəti təzahürü” adlandırıb.
“ABŞ-ın zorla qəbul etdirmə və təzyiq asılılığı bir daha müstəqilliyini və öz yolunu seçmək istəyən suveren bir ölkəni hədəfə alıb”- deyə o bildirib.
İranlı diplomat vurğulayıb ki, bu cür ədalətsiz və beynəlxalq hüquqa zidd addımlar Kuba xalqının iradəsini qıra bilməz.
“Bu qeyri-insani və qanunsuz birtərəfli sanksiyalar Kuba xalqının və onun rəhbərliyinin ABŞ hegemonluğuna qarşı duruşunu sarsıtmayacaq”- deyə Bəqai vurğulayıb.
Qeyd edək ki, ABŞ Dövlət Departamenti açıqladığı qərarla Kubanın bir sıra yüksək vəzifəli rəsmilərinə, o cümlədən Prezident Migel Dias-Kanelə qarşı yeni sanksiyalar tətbiq edib. Dövlət katibi Marko Rubio bu qərarı 2021-ci ilin iyul ayında Kubada baş verən hökumət əleyhinə etirazların yatırılmasında adıçəkilən şəxslərin iştirakına istinadla əsaslandırıb.
“Vaşinqton bu addımı Kuba azad, ləyaqətli, suveren və müstəqil qalmaq yolunu seçdiyi üçün atıb”- deyə Kuba Prezidenti Dias-Kanel bildirib.
