BAKI,AzerVoice

ABŞ Prezidenti Donald Tramp Səudiyyə Ərəbistanına “F-35” tipli qırıcı təyyarələrin satışı ilə bağlı razılıq verib. Bu qərar, Səudiyyə Ərəbistanının vəliəhdi və Baş naziri şahzadə Məhəmməd bin Salmanın ABŞ-a səfəri ərəfəsində açıqlanıb.

“Biz bunu edəcəyik, ‘F-35’ qırıcılarını satacağıq... Onlar bizim böyük müttəfiqimizdir.”-deyə Ağ Evdə jurnalistlərə verdiyi açıqlamada Tramp bildirib.

Şahzadə Məhəmməd bin Salman və Trampın görüşü bu gün Vaşinqtonda baş tutacaq.

Qeyd edək ki, rəsmi Riyad 48 ədəd “F-35” almaq niyyətindədir. Müqavilənin dəyəri bir neçə milyard dollardır və təsdiqlənərsə, Yaxın Şərqdə hərbi güc balansını dəyişdirə və Səudiyyə Ərəbistanının müdafiə qabiliyyətini əhəmiyyətli dərəcədə artıracaq.

Razılaşmanın elanından sonra “F-35” istehsalçısı olan “Lockheed Martin” şirkətinin səhmləri 1,1 faiz yüksəlib.

Analitiklərə görə, bu addım ABŞ ilə Səudiyyə Ərəbistanı arasında “strateji tərəfdaşlıqda yeni mərhələnin” başlanğıcını simvolizə edir və bölgədəki regional güc balansına da təsir göstərə bilər.