BAKI, AzerVoice, Nailə Babazadə
Səudiyyə Ərəbistanının vəliəhd şahzadəsi Məhəmməd bin Salman 18 noyabr çərşənbə axşamı ABŞ-ın paytaxtı Vaşinqtonda ABŞ Prezidenti Donald Tramp ilə görüşəcək. Tərəflərin təhlükəsizlik, müdafiə, iqtisadi əməkdaşlıq və regional böhranların idarə olunması kimi iki ölkə münasibətlərini əhatə edən əsas məsələləri müzakirə edəcəyi gözlənilir.
AzerVoice xəbər verir ki, Bin Salmanın səfəri, 2018-ci ildən sonra ABŞ-a edəcəyi ilk rəsmi ziyarət olması ilə diqqət çəkir.
Görüşlərdə ABŞ–Səudiyyə münasibətlərinin gələcəyi, təhlükəsizlik əməkdaşlığı, silah tədarükləri, həmçinin Yaxın Şərqdəki son regional proseslərin ətraflı şəkildə dəyərləndirilməsi planlaşdırılır.
Şahzadə Məhəmməd bin Salman 2018-ci ildə ABŞ-a səfərini, həmin dövrdə vəliəhd olan Məhəmməd bin Nayifə yaxın iş adamları, rəsmilər və kral ailəsi üzvlərinə qarşı aparılan siyasi təmizləmə prosesinin davam etdiyi vaxt gerçəkləşdirmişdi. O dövrdə Vaşinqton bin Nayifi daha etibarlı tərəfdaş kimi görsə də, bin Salman Tramp administrasiyası ilə yaxın münasibətlər qurmuşdu. Bayden dövründə isə münasibətlər nisbətən soyuq formada davam edib.
Bu dəfəki ziyarətdə Səudiyyə Ərəbistanının prioritetləri arasında iqtisadi əlaqələrin gücləndirilməsi və yeni əməkdaşlıq sahələrinin yaradılması ön sırada yer alır. Neftlə zəngin olan Riyad “Vizyon 2030” strateji proqramı çərçivəsində rəqəmsal infrastruktur və data mərkəzlərinə böyük sərmayə yatırır. Təkcə data mərkəzləri üçün ayrılan büdcənin 20 milyard dollar olduğu bildirilib.
Elektrikli nəqliyyat vasitələri, qabaqcıl istehsal texnologiyaları, süni intellekt və kosmik sənaye kimi yüksək məlumat tutumu tələb edən sahələrdə iki ölkə arasında ortaq layihələrin gündəmə gəlməsi gözlənilir.
Riyad eyni zamanda öz mülki nüvə proqramı üzərində işləri davam etdirir. May ayında ABŞ və Səudiyyə Ərəbistanının enerji nazirləri arasında nüvə enerjisi sahəsində əməkdaşlığı nəzərdə tutan anlaşma memorandumu imzalansa da, Tramp administrasiyasının bu məsələyə ehtiyatla yanaşdığı qeyd olunur. Nüvə silahına sahib olan İsrail də Səudiyyə Ərəbistanının ABŞ-la nüvə əməkdaşlığına qarşı çıxır.