BAKI, AzerVoice
Bu ilin mart ayında Qəzza zolağına tam blokada tətbiq olunduqdan bəri aclıq nəticəsində azı 67 uşaq həlak olub.
AzerVoice xəbər verir ki, bu barədə Qəzzadakı Media İşləri İdarəsi məlumat yayıb.
“Qəzzada qeyri-kafi qidalanma nəticəsində həyatını itirən uşaqların sayı 67-yə çatıb. Beş yaşına qədər olan 650 mindən çox uşaq yaxın həftələrdə aclıq təhlükəsi ilə üz-üzə qala bilər” - deyə, qurumun verdiyi açıqlamada bildirilib.
Qəzza zolağının Səhiyyə Nazirliyi isə bəyan edib ki, İsrailin hərbi əməliyyatları nəticəsində bu günə qədər 57 882 fələstinli həlak olub, 138 095 nəfər yaralanıb. Son 24 saat ərzində İsrailin hava hücumları və artilleriya atəşləri nəticəsində daha 59 nəfər ölüb, 208 nəfər isə yaralanıb.
Qeyd edək ki, bu il martın 2-dən bəri Qəzzaya humanitar yardım daxil olmur. İsrailin qərarına əsasən bütün nəzarət-buraxılış məntəqələri bağlı qalıb. Martın 18-də İsrail ordusu atəşkəs rejimini pozaraq Qəzzaya yenidən genişmiqyaslı hərbi hücumlara başlayıb. Baş nazir Benyamin Netanyahunun ofisi əməliyyatın məqsədini “bütün girovların azad edilməsi” kimi izah edib və HƏMAS-ın ABŞ prezidenti Donald Trampın xüsusi nümayəndəsi Stiven Uitkoff və digər vasitəçilər tərəfindən irəli sürülən təklifləri qəbul etmədiyini bildirib.
İsrail hakimiyyəti mayın 19-da Qəzzada aclıq təhlükəsinin qarşısını almaq üçün əraziyə minimum həcmdə ərzaq məhsullarının buraxılacağını elan edib. Qəzza administrasiyasının hesablamalarına görə, əhalinin əsas ehtiyaclarını qarşılamaq üçün gündəlik olaraq ən azı 500 yük maşını ilə humanitar yardım daxil olmalıdır.
