BAKI, AzerVoice

Son 48 saatda Qəzzaya 250 hava hücumu - İsrail hücumları intensivləşdirib.

AzerVoice xəbər verir ki, Qətərin paytaxtı Dohada aparılan atəşkəs danışıqları fonunda İsrail ordusu son 48 saat ərzində Qəzza zolağında təxminən 250 hədəfə hava zərbələri endirib.

İsrail ordusunun yaydığı bəyanatda bildirilir ki, hücumlar ölkənin daxili kəşfiyyat xidməti Şin-Bet (Şabak) ilə koordinasiya çərçivəsində həyata keçirilib. Zərbələr əsasən binalara yerləşdirilmiş partlayıcı qurğular, silah anbarları, tank əleyhinə raket sistemləri, snayper mövqeləri və tunel infrastrukturuna yönəlib.

Xüsusilə Beyt Hanun, Şucayya və Zeytun bölgələrində hücumların həm havadan, həm də qurudan daha intensiv xarakter aldığı bildirilir. Fələstinli mülki əhalinin yaşadığı çadırlara da hücumlar edildiyi qeyd olunub.

Digər tərəfdən, İsrail ordusunun sözçüsü Aviçay Adraee sosial şəbəkə üzərindən verdiyi açıqlamada Qəzzadakı balıqçılara və yerli sakinlərə dənizə çıxmağın qadağan edildiyini bildirib. O, dənizə girənlərin həyatının təhlükə altında olacağını vurğulayıb.

Qeyd edək ki, 2023-cü ilin oktyabr ayından bəri Qəzzaya yönələn hücumlar nəticəsində indiyədək 57 min 823 fələstinli həyatını itirib, 137 min 887 nəfər isə yaralanıb. Son olaraq martın 18-də atəşkəsin pozulmasından bu yana isə 7 min 261 nəfər ölüb, 25 min 846 nəfər yaralanıb.

İsrailin rəhbərliyi altında yaradılan Qəzza Humanitar Yardım Fondunun fəaliyyət göstərdiyi bölgələrdə humanitar yardım üçün toplaşan fələstinlilərə qarşı təşkil olunan hücumlar nəticəsində mayın 27-dən bu yana 788 nəfər həlak olub, 5 min 199 nəfər isə yaralanıb.

Baş nazir Benyamin Netanyahunun son açıqlamasına əsasən, İsrailin Qəzza zolağının tam işğalı istiqamətində hərbi əməliyyatlarını davam etdirmək niyyətində olduğu bildirilir.