BAKI,
AzerVoice
İsrail qüvvələri iyun ayında Əl-Əqsa və Hərəmi-İbrahim məscidlərinə
dəfələrlə basqın edib
AzerVoice xəbər verir ki, Fələstinin
Vəqflər və Dini İşlər Nazirliyi İsrail qüvvələrinin və Fələstin
torpaqlarını qəsb edən israillilərin iyun ayı ərzində Əl-Əqsa
məscidinə 25-dən çox dəfə basqın etdiyini açıqlayıb.
Nazirlik eyni zamanda Hərəmi-İbrahim və digər müqəddəs məkanlara
qarşı da ciddi pozuntuların qeydə alındığını bəyan edib.
Rəsmi məlumatda bildirilir ki, İsrail qüvvələri Əl-Əqsa məscidini 11 dəfə ibadətə bağlayıb, müsəlmanların girişini məhdudlaşdırıb və məscid həyətlərində yəhudi dini ayinləri icra edilib. Qurban bayramında belə minlərlə müsəlmanın sərt məhdudiyyətlər altında ibadət etdiyi qeyd olunub.
Nazirlik, həmçinin İsrailin iyun ayında Hərəmi-İbrahim məscidində 89 dəfə azan verilməsinə mane olduğunu və məscidin 12 gün ərzində bağlandığını açıqlayıb. Məbədə təhlükəsizlik qüvvələri yerləşdirilib, qapılar bağlanıb və İsrail bayrağı divarlara proyeksiya edilib.
Eyni dövrdə İsrailin Dirilmə (Qiyamət) kilsəsini 11 gün müddətinə xristianların ibadətinə bağladığı da vurğulanıb. Nablus şəhərindəki əs-Salahi əl-Kəbir məscidinə də basqın edildiyi bildirilir.
Nazirlik bu addımların müqəddəs məkanların tarixi və hüquqi statusuna açıq hücum olduğunu bildirərək, beynəlxalq ictimaiyyəti və dini təşkilatları təcili hərəkətə keçməyə çağırıb.
Qeyd edək ki, Hərəmi-İbrahim məscidi müsəlmanların dördüncü müqəddəs məkanı sayılır. Məscid 1994-cü ildə baş verən və 29 müsəlmanın şəhid olduğu qətliamdan sonra ikiyə bölünüb – bir hissəsi yəhudilərə, digəri müsəlmanlara ayrılıb. İyunun pozuntuları bu tarixi məkanın müqəddəsliyinə qarşı davamlı hücumlar kimi qiymətləndirilir.
