BAKI, AzerVoice

Yaponiyada 11 gün ərzində 911 zəlzələ qeydə alınıb.

AzerVoice xəbər verir ki, Yaponiyanın cənub-qərbində yerləşən Tokara arxipelaqında cəmi 11 gün ərzində 911 zəlzələ baş verib.

Yaponiya Meteorologiya Agentliyi (JMA) iyunun 21-dən iyulun 2-dək bölgədə maksimum 5,6 bal gücündə yeraltı təkanlar qeydə alındığını açıqlayıb.

Zəlzələlərin 610-u 1 bal və yuxarı, 220-si 2 bal və yuxarı, 60-ı isə 3 bal və yuxarı gücdə olub. Yalnız 5 baldan yuxarı olan zəlzələlərin sayı isə 3 dəfə təşkil edib. Agentlik zəlzələlərin səbəbinin hələlik məlum olmadığını bildirir.

JMA rəsmisi Kiyomoto Masaşi bölgədə sunami riski ehtimalına diqqət çəkərək, yeraltı təkanların dərinliyinin 10-20 kilometr aralığında olduğunu və bu tip zəlzələlərin təhlükə yaratdığını bildirib. O, əhalini ehtiyatlı olmağa və rəsmi xəbərdarlıqlara ciddi yanaşmağa çağırıb.

Kumamoto Universitetindən dəniz dibi topoqrafiyası üzrə mütəxəssis Dos. Prof. Dr. Yokose Hisayoşi isə NHK-yə açıqlamasında bölgədə üç aktiv fay xəttinin olduğunu və zəlzələlərin bir neçə həftə davam edə biləcəyini deyib: “Əhali daha böyük bir zəlzələyə qarşı hazır olmalıdır.”

Arxipelaqdakı Akuseki adasında yaşayan İsamu Sakamoto “Japan Times” qəzetinə açıqlamasında, artan zəlzələ tezliyinə görə iş fəaliyyətini dayandırdığını və güclü zəlzələ qorxusunun ciddi narahatlıq yaratdığını bildirib. “Əvvəlcə güclü bir səs gəlir, sonra yer titrəməyə başlayır. Bu, sarsıdıcı bir təcrübədir,” – deyə o bildirib.

Qeyd edək ki, Tokara arxipelaqında təxminən 670 nəfər yaşayır. 2023-cü ilin sentyabrında bu bölgədə 346, 2021-ci ilin dekabrında isə 308 zəlzələ baş vermişdi. Bu dəfəki göstərici isə rekord sayılır və regionda təhlükəsizlik tədbirlərinin gücləndirilməsini zəruri edir.