BAKI, AzerVoice
İsrailin ifrat sağçı naziri Netanyahunu Qəzzaya hücuma çağıaraq, məhbus mübadiləsinə qarşı çıxıb.
AzerVoice xəbər verir ki, İsrailin maliyyə naziri və ifrat sağçı Dini Sionizm Partiyasının lideri Bezalel Smotriç Baş nazir Benyamin Netanyahudan Qəzza zolağında məhbus mübadiləsi və atəşkəslə bağlı dolayı danışıqları dərhal dayandırmağı tələb edib. O, hərbi əməliyyatların “qalibiyyətlə nəticələnənə qədər” davam etdirilməli olduğunu bildirib.
Smotriç bu fikirləri partiyasının həftəlik qrup toplantısında səsləndirib. O, həmçinin İsrailin 13 iyunda İrana başladığı və artıq 12 gündür davam edən hücumlarla Tehranın nüvə proqramına ciddi zərbə vurduqlarını iddia edib.
İsrail mətbuatının məlumatına görə, ABŞ prezidenti Donald Tramp və Netanyahu Qəzzada yaxın 2 həftə ərzində mümkün atəşkəslə bağlı razılığa gələ bilər. Tramp da iyunun 27-də etdiyi çıxışda "gələn həftə Qəzzada atəşkəs əldə oluna bilər" deyib.
Qəzzada saxlanılan israilli məhbusların ailələri Smotriçin bəyanatına sərt reaksiya veriblər. Onlar nazirin əsirlərin geri qaytarılması ilə bağlı real planının olmadığını və xalqı təhlükəli populist çağırışlarla çaşdırdığını bildiriblər.
Qeyd edək ki, İsrail Nazirlər Kabineti məhbus mübadiləsi və atəşkəs danışıqlarını müzakirə etsə də, hələlik konkret qərar qəbul edilməyib.
