BAKI, AzerVoice

İsrailin Qəzzadan iki girovun cəsədini geri alması HƏMAS-ın davam edən vəhşiliyini göstərir.

AzerVoice xəbər verir ki, bu barədə ABŞ Dövlət katibi Marko Rubio bildirib.

“Bu, HƏMAS-ın davam edən vəhşiliyini açıq şəkildə xatırladır; bu vəhşilikdən hələ də 56 ailə əziyyət çəkir, o cümlədən amerikalılar Omer Notra və İtay Şinin ailələri ki, onların yaxınları 2023-cü il oktyabrın 7-dən etibarən Qəzzada HƏMAS tərəfindən girov saxlanılır. Bütün girovlar dərhal azad edilməlidir” - deyə, Rubio qeyd edib.

Xatırladaq ki, İsrail cümə axşamı günü ordusunun Qəzza zolağından iki girovun cəsədini geri aldığını açıqlayıb. İsrailin baş naziri Benyamin Netanyahu bildirib ki, ordu HƏMAS tərəfindən saxlanılan iki girovun – Cudi Vaynşteyn-Haqay və Qadi Haqayın cəsədini geri qaytarıb. Onlar “Nir Oz” kibutsundan olublar.

“Şabak (daxili təhlükəsizlik xidməti) və ordu tərəfindən Qəzza sektorunda həyata keçirilən xüsusi əməliyyat zamanı HƏMAS tərəfindən saxlanılan iki girovun cəsədləri geri alınıb. Onlar 2023-cü il oktyabrın 7-də öldürülərək Qəzza sektoruna aparılıb” - deyə, Netanyahu bildirib.