BAKI, AzerVoice
İndoneziyanın Qərbi Cava əyalətinin Cirebon bölgəsində yerləşən Gunung Kuda daş ocağında baş verən uçqun nəticəsində 14 nəfərin öldüyü bildirilib.
AzerVoice xəbər verir ki, dünən baş verən hadisə zamanı xilasetmə qrupları dağıntılar altında 14 nəfərin cəsədini aşkarlayıb, 12 nəfər isə yaralı olaraq xilas edilib.
Rəsmilər hələ də 6–8 nəfərin dağıntılar altında qaldığını ehtimal edir. Hadisə yerində axtarış-xilasetmə əməliyyatları polis, ordu, könüllülər və beş ekskavatorun iştirakı ilə davam etdirilir.
Hadisə ilə bağlı istintaq başladılıb, daş ocağının sahibi də daxil olmaqla 6 nəfər saxlanılıb.
Xatırladaq ki, İndoneziyada qeydiyyatsız mədən və daş ocaqları geniş yayılıb. 2024-cü ildə Sumatra adasında qeyri-qanuni işlədilən qızıl mədənində baş verən torpaq sürüşməsi nəticəsində azı 15 nəfər həyatını itirib.