Bakı, AzerVoice, Nailə Babazadə

Qambiya sahillərində təxminən 200 miqrantı daşıyan qayığın aşması nəticəsində azı 7 kişi həyatını itirib, çox sayda şəxs isə dənizdə itkin düşüb.

AzerVoice xəbər verir ki, Rəsmilərin verdiyi məlumata görə, Avropaya çatmağa çalışan miqrantları daşıyan qayıq çərşənbə gecə yarısı Şimal Sahili Bölgəsində, Cinak (Jinack) kəndi yaxınlığında aşıb.

Qambiya Müdafiə Nazirliyinin açıqlamasında bildirilib ki, hadisədən sonra qayıq qum sahilində oturmuş vəziyyətdə aşkarlanıb. İspaniyanın Kanar adalarına doğru yola çıxan qayıqdakı sərnişinlərdən indiyədək 96 nəfər xilas edilib. İtkin düşən şəxslərin tapılması üçün axtarış-xilasetmə işləri davam etdirilir.

Nazirlik hadisədən sonra Qambiya Hərbi Dəniz Qüvvələrinin bir neçə gəmi və köməyə gələn balıqçı qayığı ilə genişmiqyaslı xilasetmə əməliyyatı başlatdığını açıqlayıb.

Rəsmilər qurbanlardan bəzilərinin Qambiya vətəndaşı olmadığını, şəxsiyyətlərinin müəyyənləşdirilməsi istiqamətində işlərin davam etdiyini bildiriblər. Boğularaq ölən 7 nəfərin cəsədi tapılıb, xilas edilənlərdən 10-nun vəziyyətinin ağır olduğu və təcili tibbi yardım aldıqları qeyd olunub.

Qərbi Afrikadan olan miqrantlar və sığınacaq axtaran şəxslər Avropaya, xüsusilə Kanar adaları vasitəsilə çatmaq üçün getdikcə daha çox Qambiyanı çıxış nöqtəsi kimi seçirlər. Atlantik okeanı üzərindən keçən bu marşrut miqrantlar üçün ən təhlükəli yollardan biri hesab olunur.

Avropa İttifaqının son illərdə qeyri-qanuni miqrasiyanı azaltmaq məqsədilə bəzi Şimali Afrika ölkələri ilə razılaşmalar imzalaması miqrantları daha uzun və riskli olan Atlantik marşrutuna yönəldib.

Məlumata görə, 2024-cü ildə təxminən 47 min nəfər Kanar adalarına çatmağa müvəffəq olub. “Caminando Fronteras” adlı vətəndaş cəmiyyəti təşkilatının məlumatına əsasən isə bu təhlükəli səfər zamanı 9 mindən çox miqrant həyatını itirib.