BAKI, AzerVoice

Argentina hökuməti miqrasiya qanunvericiliyində dəyişikliklərə dair fərman dərc edib. Yeni qaydalara əsasən, ölkəyə daxil olmaq istəyən bütün əcnəbilər tibbi sığorta təqdim etməli olacaqlar.

AzerVoice xəbər verir ki, sənəd rəsmi hökumət bülletenində yayımlanıb.

"Mövcud qaydalara əsasən, istənilən miqrasiya kateqoriyası üzrə ölkəyə giriş icazəsi almaq istəyən əcnəbilər daxilolma məqsədini göstərən bəyanatla yanaşı, tibbi yardım almaq üçün nəzərdə tutulmuş sığortanı da təqdim etməlidirlər” - deyə, fərmanda qeyd olunub.

Yeni qaydalar həmçinin cinayət törətmiş şəxslərin ölkəyə daxil olması və yaşayış icazəsi alması prosedurlarını da sərtləşdirir. Bundan əlavə, əvvəlki normalara əsasən, Argentinada doğulan uşağın valideynləri dərhal daimi yaşayış icazəsi üçün müraciət edə bilirdilərsə, indi onlara yalnız üçillik (uzadılması mümkün olan) müvəqqəti yaşayış icazəsi veriləcək.

Sənəddə həmçinin, əcnəbilər üçün səhiyyə sisteminin pullu əsaslara keçməsi ilə bağlı hökumətin əvvəlki planları rəsmiləşdirilib. Artıq Argentinada turistlər və müvəqqəti yaşayış icazəsi olan şəxslər yalnız təcili tibbi yardımı pulsuz şəkildə ala biləcəklər.