BAKI, AzerVoice

ABŞ İsraillə İranla bağlı hərbi əməkdaşlığı dayandırır.

AzerVoice xəbər verir ki, İsrailin Kanal 12 televiziya kanalı ABŞ-ın İranın nüvə obyektlərinə mümkün hücumlarla bağlı İsraillə hərbi koordinasiyanı dayandırdığını iddia edib.

Bildirilir ki, bu qərar Tehranla davam edən nüvə danışıqlarına zərər verməmək üçün verilib.

İddialara görə, ABŞ prezidenti Donald Tramp son günlərdə İsrailin baş naziri Benyamin Netanyahu ilə telefon danışığında İranın nüvə obyektlərinə birtərəfli hücum etməməsi barədə açıq xəbərdarlıq edib. Trampın Netanyahuya belə bir hücumun hazırda danışıqların həssas mərhələsində mənfi nəticələrə yol aça biləcəyini bildirib.

Məlumata əsasən, ABŞ rəhbərliyi İranla “güclü və balanslı” bir nüvə razılaşması əldə etməyə çalışır və bu prosesə hərbi gərginliyin zərbə vurmasından ehtiyat edir. Prezident Trampın ABŞ ordusuna İsraillə bu sahədəki hərbi əməkdaşlığı dondurmaq göstərişi verdiyi də vurğulanıb.

İsrail tərəfinin isə İranın nüvə obyektlərinə qarşı mümkün hücumda ABŞ-ın dəstəyinə, xüsusilə raketdən müdafiə sistemlərinə ehtiyac duyduğu qeyd edilib. Mümkün əməkdaşlıq boşluğu isə İsrailin birtərəfli addımlarını son dərəcə riskli vəziyyətə salır.

Qeyd edək ki, ABŞ və İran arasında nüvə danışıqları Oman vasitəsilə davam edir. Sonuncu görüş mayın 23-də Romada baş tutub. Tramp danışıqlarda “əhəmiyyətli irəliləyiş” olduğunu bildirib və yaxın vaxtlarda müsbət nəticələrin əldə olunacağını qeyd edib.