BAKI, AzerVoice
Almaniyanın xarici işlər naziri Yohann Vadeful hesab edir ki, Ukrayna münaqişəsi çox güman ki, danışıqlar yolu ilə həll olunacaq.
AzerVoice xəbər verir ki, o, bu barədə "Süddeutsche Zeitung" qəzetinə müsahibəsində bildirib.
“Mənim fikrimcə, əvvəldən aydın idi ki, bu müharibə, çox güman ki, danışıqlar yolu ilə başa çatacaq. Çünki aydındır ki, nüvə silahına malik Rusiyanın tam təslim olacağını gözləmək mümkün deyildi. Bu baxımdan indi özümüzlə bir qədər daha dürüst olmuşuq” — deyə, Vadeful qeyd edib.
Ondan Almaniyanın Rusiya ilə hibrid müharibə vəziyyətində olub-olmaması barədə soruşduqda, Almaniya XİN rəhbəri müharibə sözündən qaçınmağa üstünlük verdiyini vurğulayıb.
“Amma biz artıq açıq-aydın sülh şəraitində deyilik. Bu problemi həll etmək üçün yeni yollar tapmalıyıq. Bu həm də hüquqi bazanı diqqətlə öyrənməyi tələb edir” — deyə, Vadeful yekunlaşdırıb.