BAKI, AzerVoice
ABŞ, yeni nəsil B61-13 nüvə bombalarının iyul ayında kütləvi istehsalına başlayacaq.
AzerVoice xəbər verir ki, bu barədə ABŞ-ın Milli Nüvə Təhlükəsizliyi Agentliyi (NNSA) məlumat yayıb.
B61-13 versiyasının partlayış gücü 360 kiloton təşkil edir. Bu, onu ABŞ-ın hazırkı nüvə arsenalındakı ən güclü başlıqlardan birinə çevirir. Yeni bombanın strateji təyyarələr və taktiki döyüş vasitələri ilə istifadəsi planlaşdırılır.
NNSA-nın açıqlamasında qeyd olunur ki, modernləşdirilmiş B61-13, ABŞ prezidentinə böyük və müdafiəsi çətin olan hədəflərə qarşı daha geniş hərbi seçimlər təqdim edəcək. Hər bir bombanın dəyəri təxminən 30 milyon dollar olaraq qiymətləndirilir.
Xatırladaq ki, may ayında Texas ştatındakı “Pantex” müəssisəsində ilk B61-13 nümunəsi istehsal olunub. Bombanın həm taktiki qırıcılarla, həm də strateji bombardmançı təyyarələrlə istifadəsi nəzərdə tutulur. Onun ilk daşıyıcısı kimi B-21 Raider strateji bombardmançısı göstərilir.
ABŞ-ın əsas nüvə silahlarından biri olan B61-12 bombası isə tənzimlənən gücü ilə həm taktiki, həm də strateji vəzifələri icra edə bilir. B61-13 isə bu xətdə daha da gücləndirilmiş və geniş imkanlı versiya hesab olunur.
