BAKI, AzerVoice

Rusiya, Ukrayna ilə sülh üçün hazırlanacaq memoranduma dair prinsipləri və müddətləri müəyyənləşdirir.

AzerVoice xəbər verir ki, Rusiya Xarici İşlər Nazirliyinin sözçüsü Mariya Zaxarova İstanbul danışıqları çərçivəsində əldə olunan razılaşmalara əsasən Rusiya tərəfinin Ukrayna ilə mümkün sülh müqaviləsinə dair memorandum layihəsi üzərində işlədiyini açıqlayıb.

Dağıstanın paytaxtı Mahaçqalada keçirilən mətbuat konfransında çıxış edən Zaxarova bildirib ki, sözügedən memorandumda münaqişənin həlli üçün əsas prinsiplər, kompromis şərtlər, potensial atəşkəs və sülh sazişi üçün müəyyən son tarixlər əks olunacaq. O, həmçinin qeyd edib ki, Moskva Kiyevdən eyni vaxtda öz layihə təklifini göndərməsini gözləyir.

Zaxarova Ukraynanın mülki hədəflərə hücum etdiyini və bu cür “terror metodları” ilə guya danışıqlar prosesi görüntüsü yaratmağa çalışdığını bildirərək, “Bu cür hücumlar vəziyyəti daha da gərginləşdirir” - deyə bildirib.

İsrailin Cenin bölgəsində diplomatlara atəş açması ilə bağlı suala cavab verən Zaxarova həmin hücumların sülh prosesinə xələl gətirdiyini vurğulayıb. O, Fələstində yaşananları “müasir dövrün ən utancverici humanitar faciələrindən biri” adlandıraraq, Rusiyanın beynəlxalq platformalarda bu məsələ ilə bağlı aktiv təmasda olduğunu deyib.

Qeyd edək ki, Rusiya ilə Ukrayna arasında birbaşa danışıqlar Türkiyənin vasitəçiliyi ilə İstanbulda aparılır və əvvəlki razılaşmaların əldə olunması Kiyevin mövqeyi səbəbindən çətinliklə baş tutmuşdu.