BAKI, AzerVoice

ABŞ Prezidenti Donald Tramp Tehranın nüvə proqramı ilə bağlı Vaşinqton və Tehran arasında razılaşmanın bir neçə həftə ərzində əldə olunmasının mümkün olduğunu bildirib.

AzerVoice xəbər verir ki, bu barədə o, Ağ Evdə jurnalistlərə açıqlama verib.

“Əslində dəqiq bilmirəm. Amma hesab edirəm ki, bu yaxın bir-iki həftədə baş verə bilər” - deyə, Tramp jurnalistlərin müvafiq sualını cavablandırarkən bildirib.

Xatırladaq ki, ABŞ və İran nümayəndə heyətləri mayın 23-də Romada İranın nüvə proqramı ətrafında yaranmış böhranın nizamlanması üçün danışıqların beşinci raundunu aparıblar. Danışıqlarda Oman vasitəçi ölkə qismində çıxış edib. Oman xarici işlər naziri Bədr əl-Busaidi danışıqlardan sonra "müəyyən, lakin yekunlaşmamış irəliləyiş" əldə olunduğunu bəyan edib.

İranın nümayəndə heyətinin rəhbəri Seyid Abbas Araqçi isə bildirib ki, Tehran və Vaşinqton bir-iki görüşlə müsbət nəticənin əldə olunacağına ümid edir.

ABŞ Dövlət Departamentinin mətbuat xidmətinin rəhbəri Temmi Bryus isə çərşənbə axşamı keçirilən brifinqdə görüşün konstruktiv xarakter daşıdığını və tərəflərin yaxın zamanda yenidən görüşmək barədə razılığa gəldiklərini bildirib.